د روسیې ولسمشر ولادمیر پوتین د یو کمربند یوې لار پروژې په اړه جوړېدونکې غونډه کې د ګډون لپاره چین ته سفر وکړ.
فرانس پریس خبري اژانس ویلي، چې دا سفر د دواړو هېوادونو ترمنځ د اړیکو د لا پیاوړتیا په موخه ترسره شوی.
نوموړی به د یو کمر بند یوې لار پروژې په اړه جوړېدونکې غونډه کې د ګډون ترڅنګ له خپل چینایي سیال شي جینګ پینګ سره وګوري.
د شي او پوتین تر منځ وروستۍ لیدنه د مارچ په میاشت کې وه، کله چې د چین ولسمشر روسیې ته سفر وکړ او له مسکو سره یې د اقتصادي او پوځي همکاریو د پیاوړتیا ملاتړ وکړ، څو له هغه څه سره چې «امریکایي قدرت» دی، مبارزه وشي.
په پام کې ده چې د "یو کمربند یوه لار" پروژې په اړه ناسته روانه اوونۍ په بیجینګ کې پیل شي.
په دغه ناسته کې به د نړۍ د ۱۳۰ هېوادونو استازي برخه واخلي.
د یادونې ده، چې پر اوکراین له یرغل وروسته دا لومړی ځل دی، چې پوتین یو ستر قدرت لرونکي هېواد ته سفر کوي.
