اسرایلي ځواکونو خبر ورکړی چې تېره ورځ(پنج شنبه) سهار مهال له یمن څخه د یاد هېواد پر "ګوریون"هوایې ډګر برید ترسره شوی دی.
له دغه برید سره هم مهاله اسرایلي ځواکونو د یاد هېواد په بېلابېلو ښارونو کې د خطر زنګ وهلی دی.
اسرایلیو ځواکونو ویلي له یمن څخه توغول شوي توغندي مخکې له دې چې د اسرایلو خاورې ته دننه شي د یاد هېواد د هوایې ځواکونو لخوا له منځه وړل شوي خو دوی په بېلابېلو ښارونو کې د خطر زنګ وهلی دی.
د اسرایلو د پوځ ویاند دغه برید د حوثیانو کار بللی او ویلي یې دي چې یاد توغندي تل ابیب ته نږدې د ګوریون هوایې ډګر پر لور توغول شوي خو چاته پکې زیان نه دی اوښتی.
بل خوا د حوثیانو ډلې ویلي چې پر یادې ډلې د امریکا د بریدونو په ځواب کې به پر اسرایلو هم بریدونه ترسره کړي.
حوثیانو پر اسرایلو دغه بریدونه په داسې حال کې کړي دي چې د تېرې اوونۍ له شنبې ورځي د امریکا لخوا پر یاده ډله د بریدونو له امله ۳۱ تنو خپل ژوند له لاسه ورکړی او پکې ددغه ډلې بېلابېل مرکزونه په نښه شوي دي.
باید وویل شي چې حوثیانو د تېرې سه شنبې په ورځ هم پر اسرایلو برید کړی و او ویلي یې و چې دغه ډول بریدونه به نور هم ډېروي.
