خبریاله: نازو عمري
په ملګرو ملتونو کې د ایران استازي امیرسعید ایرواني د ملګرو ملتونو سرمنشي انتونیو ګوتېرش ته یو بېړنی لیک استولی او د امریکا د ولسمشر ډونلډ ټرمپ وروستي ګواښونه یې د ایران په کورنیو چارو کې ښکاره لاسوهنه بللې ده.
ایراني استازي ویلي: "دا ډول څرګندونې د ایران د خلکو د ملاتړ تر نوم لاندې، د فشار او مداخلې دوامداره تګلاره ده."
بلخوا، د ملګرو ملتونو د بشري حقونو ځانګړې استازې مای ساتو هم په ایران کې د وروستیو لاریونونو پر مهال د ۸ کسانو په وژل کېدو اندېښنه ښودلې او له ایراني چارواکو یې غوښتي چې د خلکو د بیان ازادۍ ته درناوی وکړي او له زور زیاتي ډډه وکړي.
تردې وړاندې ډونلډ ټرمپ ایراني چارواکو ته خبرداری ورکړی وو چې که د سولهییزو لاریونوالو پر ضد تاوتریخوالی وشي، واشنګټن به د هغوی د ژغورنې لپاره اقدام وکړي.
