هندي رسنیو راپور ورکړی، چې په یوه مسافر وړونکي بس کې د اورلګېدنې له امله لږ تر لږه نهه کسان مړه شوي او ۲۱ نور ټپیان شوي دي.
د هندوستان ټایمز د راپور له مخې، دا پېښه نن پنج شنبه، د ډسمبر په ۲۵مه د هندوستان په سويل کې د چیتردورګا ولسوالۍ د ګورلاتو په سیمه کې رامنځته شوې ده.
راپور زیاتوي، اورلګېدنه هغه مهال رامنځته شوې، چې یو بار وړونکی موټر له دغه بس سره وجنګېد.
ویل شوي چې دا یو «بستر دار» بس و او مسافر پکې بند پاتې شوي وو.
پولیسو ویلي، ځیني ټپیان روغتون ته لېږدول شوي او ښایې، چې د مړو شمېر لا زیات شي.
د یادونې وړ ده، چې هندوستان سږ کال د دا ډول څو خونړیو ترافیکي پېښو شاهد و.
