کابل (کوه نور، ۲۶ عقرب ۱۴۰۴): د امریکا د متحده ایالاتو ولسمشر، دونالد ټرمپ اعلان کړی، چې جمهوريپالان په کانګرس کې پر داسې طرحه کار کوي، چې له مخې به یې هر هغه هېواد چې له روسیې سره سوداګري کوي، له «سختو بندیزونو» سره مخ شي.
ټرمپ پرون خبریالانو ته ویلي، دا طرحه د ده په وړاندیز چمتو شوې او هدف یې دا دی، چې پر هغو هېوادونو فشار واچول شي، چې لا هم له مسکو سره سوداګریزو اړیکو ته دوام ورکوي.
د نوموړي پر وینا، ښایې ایران هم د دې طرحې په هدف شوو هېوادونو کې شامل شي.
دا څرګندونې په داسې حال کې شوي، چې د واشنګټن او مسکو ترمنځ ترینګلتیاوې په وروستیو میاشتو کې ډېرې شوي او د ولسمشر ټرمپ اداره هڅه کوي، چې پر روسیې او د هغې پر متحدینو اقتصادي فشارونه ډېر کړي.
