ڪابل (ڪوه نور، ۹ جدي ۱۴۰۴): د امریکا ولسمشر ډونالډ ټرمپ ادعا کړې، چې د وینزویلا پر یوه ډاک یې برید کړی، هغه ځای، چې د ده پر وینا د نشهيي توکو د بارولو لپاره کارول کېده.
ټرمپ د جمعې په ورځ په یوه راډیويي مرکه کې د وینزویلا پر ضد د برید یادونه کړې او کله، چې د دوشنبې په ورځ خبریالانو ترې یاد هېواد کې د یوې چاودنې په اړه وپوښتل؛ نو ویې ویل، چې امریکا پر هغه تاسیساتو برید کړی چېرته، چې پر نشته یې توکو کښتۍ بارېږي.
هغه ویلي، په هغه بندر کې یوه لویه چاودنه شوې چېرته، چې وینزوېلا کښتۍ له نشهيي توکو باروي.
ټرمپ دا ونهویل، چې دا برید د امریکا پوځ کړی که CIA، او نه یې هم د برید دقیق ځای څرګند کړی دی.
د نړۍوالو رسنیو د راپورونو پر اساس، دا د امریکا له خوا وینزویلا کې د فشار د کمپاین له پیل وروسته، هلته د امریکايي ځواکونو لومړی ځمکنی برید بلل کېږي.
دا اعلان پرون د دوشنبه د جدي په نهمه وشو او ورسره هممهاله د امریکا پوځ وویل، چې په ختیځ پسیفیک سمندر کې یې پر یوه بله شکمنه د نشهيي توکو وړونکې کښتۍ هم برید کړی، چې لږ تر لږه دوه کسان په کې وژل شوي دي.
