کابل (کوه نور، ۲۹ مېزان ۱۴۰۴): د امریکا ولسمشر ډونالډ ټرمپ پرون ورځ حماس ته خبرداری ورکړی، چې که چېرې دا ډله له اسراییلو سره د غزې تړون مات کړي؛ نو له منځه به یووړل شي.
ټرمپ ویلي، چې حماس ته به یو چانس ورکړل شي؛ تر څو اوربند وساتي.
په همدې حال کې د ولسمشر ټرمپ مرستیال JD وینس له دې څرګندونو وروسته اسراییلو ته تللی؛ ترڅو له امریکايي استازو سره یو ځای شي، ځکه، چې د اوونۍ په پای کې تاوتریخوالي د اوربند پر سر خطر رامنځته کړی و.
ټرمپ سپینه ماڼۍ کې د استرالیا له صدراعظم انتوني البانیز سره د ګډې ناستې پر مهال خبریالانو ته ویلي، چې له حماس سره یې یوه معامله کړې، چې هغوی به ښه چلند کوي، سم او مهربانه به وي.
د ټرمپ پر وینا، که حماس داسې ونه کړي نو د هغوئ د له منځه تللو لپاره به ورشي او که اړتیا وه نو یاده فلسطینۍ ډله به له منځه یوسي.
ټرمپ دا هم ویلي، چې حماس اوس ډېر کمزوری شوی، ځکه، چې د سیمې ملاتړی ایران د امریکا او اسراییلو تر سږنیو بریدونو وروسته احتمال نه لري، چې له فلسطین مرسته وکړي.
ټرمپ لږ تر لږه دوه اوونۍ وړاندې د غزې د تړون منځګړیتوب کړی و؛ خو دا تړون بیا بیا له ګواښ سره مخ شوی، ځکه اسراییل حماس تورنوي، چې د وژل شویو او یرغمل شویو د جسدونو سپارلو کې ځنډ کوي او بریدونه ترسره کوي.
بل پلو د حماس مشر مذاکرهکوونکی، "خلیل الحیة" د مصر له "القاهره نیوز" سره په خبرو کې ویلي، چې دا ډله لا هم د اوربند تړون ته ژمنه ده.
هغه د سه شنبې سهار په خپرو شویو څرګندونو کې ویلي، چې د جسدونو راایستلو کار ورته ډېر ستونزمن شوی؛ خو پر وینا یې، چې دوی جدي دي او سخت کار کوي، چې خپل پاتې جسدونه وباسي.
د نوموړي پر وینا، د غزې تړون به دوام پیدا کړي، ځکه دوی یې دوام غواړي او د یاد تړون د پابندۍ لپاره یې اراده قوي ده.
په همدې حال کې د ټرمپ ځانګړي استازي سټیو ویټکاف او د هغه زوم او سلاکار جیرډ کوشنر د دوشنبې په ورځ د اسراییلو له صدراعظم بنیامین نتنیاهو سره کتلي؛ ترڅو د سیمې د حالاتو په اړه خبرې وکړي.
همداراز، د ډونالډ ټرمپ مرستیال ولسمشر JD وینس او مېرمن یې اوشا د واشنګټن څخه اسراییلو ته روان شوي؛ خو خبریالانو ته یې د خپل سفر په اړه نور وضاحت نه دی ورکړی.
د اسرایلو د لومړي وزیر بنیامین نتنیاهو دفتر بیا ویلي، چې JDوینس او د هغه میرمن اوشا به هم له هغه سره وویني.
