پاکستاني پولیس وايي، د هغو وسله والو لټون یې پیل کړی، چې د بلوچستان په نوشکي سیمه کې یې ۱۱ پاکستاني وګړي وژلي دي.
دوی د ملکي وګړو وژل کېدل غیر انساني کړنه بللې او ویلي یې دي چې عاملین به یې ژر تر ژره د قانون منګولو ته وسپاري.
سره له دې، چې تر اوسه د یادې پېښې مسوولیت چا نه دی منلی؛ خو پاکستاني لوري د پېښې پړه پر بلوڅ ازادي غوښتونکو ور اچولې ده.
د راپورنو پر اساس، په وژل شویو کسانو کې نهه یې د پنجاب اوسېدونکي وو.
یاد کسان په یو بس موټر کې د بلوچستان له مرکز کوېټې څخه د ایران تفتان ته پر لاره وو چې له نوشکي ښار څخه شپږ کیلو متره لرې په« سلطاني چړهايي» سیمه کې د ناڅرګندو وسله والو کسانو له لوري له بس ښکته او بیا پرې ډزې شوې دي.
د پاکستاني رسنیو د راپورنو له مخې، په پېښه کې پنځه کسان ټپیان شوي، چې اوس مهال تر درملنې لاندې دي.
د یادونې ده چې په دې وروستیو کې په بلوچستان او پښتونخوا کې د نا امنۍ پېښې زیاتې شوې، چې ډېری یې د پاکستاني پوځیانو خلاف کېږي
خبرياله: خاطره اکبري
