د خیبر پښتونخوا په مردان سیمه کې یو جګپوړی پاکستانی قوماندان اعجاز خان وژل شوی دی.
د پاکستاني رسنیو د خبر له مخې، هغه نن سهار وختي له وسله والو کسانو سره په نښته کې وژل شوی دی.
د معلوماتو پر بنسټ، په دې نښته کې درې نور پاکستاني پولیس هم ټپیان شوي دي.
بلخوا نن سهار د پېښور په پندو سیمه کې هم موټر سایکل سپرو وسله والو پر پولیسو برید کړی چې په پایله کې یې يو پولیس وژل شوی او بل ژوبل دی.
تر اوسه د دغو پېښو مسوولیت کومې وسله والې ډلې نه دی منلی.
په دې وروستیو کې د پاکستان په ځينو سيمو کې د ناامنۍ پېښې زياتې شوې دي.
همدا څه موده وړاندې هم په خیبر پښتونخوا کې د پوځ پر پوسته وسله وال برید کې لس پوځیان ووژل شول او شپږ نور ټپیان شول.
