د ایران وسله وال پوځ د اسرایلو په تازه بریدونو کې د خپلو دوه نورو لوړ رتبه پوځي چارواکو غلام رضا محرابي او مهدي رباني د وژل کېدو خبر ورکړی دی.
د مالوماتو له مخې دغه دوه تنه وژل شوي ایراني چارواکي یو د استخباراتو مرستیال غلام رضا محرابي او بل یې هم مهدي رباني د ایران د وسله والو ځواکونو درستیز د عملیاتي څانګې مرستیال و.
د ایران دغه دوه لوړ پوړي چارواکي په داسې حال کې وژل کېږي چې اسرایلو تېره ورځ هم په یوه توغندیز برید کې د ایران څو نور لوړ پوړي چارواکي وژلي وو.
دا بریدونه په داسې حال کې ترسره شوي چې د ایران سپاه پاسداران تېره ورځ ګڼلې وه چې ایت الله علي خامنه یې، حبیب الله سیاري د دغه هېواد سرپرست لوی درستیز او احمد واحدي د سپاه پاسداران د مشر په توګه وټاکي.
سپاه پاسداران په یوه بیانیه کې ویلي چې دغه اشخاص نن د حسین سلامي او محمد باقري له وژل کېدو وروسته په دې دندو ګمارل شوي دي.
باید وویل شي اسرایلي ځواکونو تېره ورځ د ایران پر یو شمېر ښارونو بریدونه ترسره کړل چې د یاد هېواد اټومي تاسیستات، د بالیستیکي توغندیو فابریکې او پوځي قومندانۍ یې پکې په نښه کړې وې چې له دې امله د دواړو هېوادونو ترمنځ توده جګړه روانه ده.
