د نړۍوالو رسنیو د راپورونو په اساس اسرایلي ځواکونو نن ورځ(چهارشنبه، د وري ۶مه) د غزې په بېلابېلو سیمو کې هوایې بریدونه کړي دي چې پکې تقریباً ۱۱ تنه وژل شوي دي.
په راپورونو کې راغلي چې په مړو شویو وګړو کې پنځه ماشومان شامل دي چې یو یې شپږ میاشتینی ماشوم دی.
په همدې حال کې د قطر او عربستان لخوا نه د اسرایلو بریدونه غندل شوي او ددغه بریدونو د بندولو غوښتنه یې کړې ده.
بل خوا د غزې د روغتیا وزارت خبر ورکړی چې په تېر نږدې یو نیم کال کې د اسرایلو او حماس غورځنګ ترمنځ جګړه کې څه د پاسه ۵۰ زره او ۱۴۴ فلسطینیان وژل شوي او ۱۱۳ زره او ۷۰۴ نور ټپیان شوي دي.
په همدې حال کې بیا اسرایلي ځواکونو په سوریه کې هم بمبارۍ ته زور ورکړی او د یاد هېواد په درعا کې یې شپږ تنه وژلي دي.
د یادونې وړ ده چې د اسرایلي ځواکونو لخوا نه پر غزې د تېرې ورځې برید کې هم ۲۳ تنو خپل ژوند له لاسه ورکړی وو.
