د راپورونو په اساس غزه کې د اسرایلي ځواکونو د بریدونو له پیله تر دې دمه نږدې ۵۰۰ فلسطیني ماشومان وژل شوي دي.
د غزې د ملکي دفاع ادارې ویاند محمود باسل ویلي چې د اسرایلو له لوري له حماس ډلې سره د جګړې په پایله کې په یو اړخیزه توګه دا ۵۰۰ تنه ماشومان وروسته له هغې ددغه جنګ قربانیان شوي چې د دواړو لورو ترمنځ اوربند مات شوی دی.
په همدې حال کې پر غزه د تېرو ۲۴ ساعتونو په پایله کې د اسرایلیو ځواکونو د تازه بریدونو له امله ۲۰ کسانو خپل ژوند بایللی دی.
د فلسطین د روغتیا وزارت د مالوماتو له مخې د تېرې مارچ میاشتې له ۱۸ تاریخ راپه دېخوا د اسرایلي ځواکونو د بریدونو له امله یو زر او ۵۴۲ فلسطینیان له اوربند ماتېدو وروسته وژل شوي دي.
یاد وزارت همدارنګه خبر ورکړی چې د اسرایلو او حماس ډلې ترمنځ د نښتې له پیل راهیسې تر اوسه ۵۰ زره او ۹۱۲ تنه فلسطینیان وژل شوي او ۱۱۵ زره او ۹۸۱ نور ټپیان شوي دي.
هېره دې نه وي چې د ۲۰۲۳ کال د اکټوبر میاشتې په اووم تاریخ د حماس ډلې لخوا د بریدونو له امله ۱۱۳۹ اسرایلیان وژل شوي دي.
