د روسيې ولسمشر ولادمير پوټین تېره ورځ منلې چې راتلونکې يوه مياشت به د اوکراين پر انرژي او اټومي تاسيساتو بريدونه نکوي، خو ويلي يې دي چې دغه پرېکړه د بشپړ اوربند لامل نشي کېدای.
رويټرز خبري اژانس ويلي، پوتين منلې چې تر يوې مياشتې به دواړه هېوادونه د يو بل پر اټومي تاسيساتو بريدونه نکوي.
دغه پرېکړه داسې مهال کيږي چې تېره شپه پوتين له خپل امریکايي سیال سره له دوه ساعتو ډېرې تيليفوني خبرې وکړې.
له دې وړاندې هم د روسيې او امريکا ترمنځ اوکراین کې د سولې په اړه خبرې پيل شوې چې زيلنسکي پکې د خپل نشتون له امله مخالفت کړی وو.
په همدې حال کې بيا زيلنسکي له دغې پریکړې هرکلی کړی دی او ويلي يې دي چې هيله لري د دواړو هېوادونو د ولسمشرانو د خبرو بشپړ جزيات ورسره شريک کړل شي.
