په خیبرپښتونخوا کې د پاکستاني پولیسو پر موټر وسلهوال برید کې دوه پولیس وژل شوي او یو بل ټپي دی.
برید تېره شپه ناوخته د پېښور په ورسک کې هغه مهال وشو چې د مېچنۍ سیمې پولیسو ګزمه کوله.
د پاکستاني رسنیو د راپورونو له مخې، په سیمه کې د پولیسو او وسله والو ترمنځ یو ساعت نښته هم شوې.
د برید مسوولیت تر اوسه کومې ډلې پر غاړه نه دی اخیستی.
پاکستاني پولیس وایي، په سیمه کې یې د لټون عملیات پیل کړي دي.
د ټولنیزو رسنیو په خپره شوې ویډیو کې لیدل کېږي چې په برید کې د پولیسو موټر زیانمن شوی دی.
دا په داسې حال کې ده چې د یکشنبې په ورځ هم د پېښور په بوټ بازار کې په چاودنه کې دوه کسان وژل شوي او یو بل ټپي شوی و.
دغه پېښه پر موټر سایکل د لېږدونکو چاودېدونکو توکو د چاودنې له امله رامنځ ته شوې وه.
په پاکستان کې دا پېښې داسې مهال رامنځ ته کېږي چې تازه د شهباز شریف پر مشرۍ نوي حکومت لوړه کړې ده.
