د چین په بېلابيلو ولايتونو کې د سېلابونو له امله ۸۵ تنه مړه شوي او ۳۱ تنه نادرکه دي.
د چین په شمالي سیمه مېيون ولسوالي کې د ورښتونو او سېلابونو له امله ۳۱ تنه مړه شوي دي.
الجزيرې شبکې ليکلي، مړه شوي کسان د مشرانو (سپين ږيرو) په يوه مرکز کې اوسېدل، چې د سېلاب له امله بند پاتې او بلاخره مړه شول.
چارواکو ويلي، د سپین ږیرو دغه مرکز د ښار په منځ کې وو، نو له همدې امله د بېړني چمتووالي په پلان کې شامل نه وو.
د مېيون ولسوالي منشي ويلي، « دا پېښه ښيي چې زمونږ بېړني پلان نيمګړتياوې لرلې، او په دغه برخه کې زمونږ معلومات کم وو».
د سرچينې د معلوماتو له مخې، د سپین ږیرو دغه مرکز کې ۶۹ تنه اوسېدل چې ۵۵ هغه معلول وو.
دغه مرکز د يوه سيند تر څنګ جوړ شوی وو.
د مېيون بند کې د بارانونو له امله د اوبو کچه د ريکارډ تر کچې رسېدلې وه.
ورته مهال بیا د يادو ورښتونو له امله سلګونه زره کسان اغېزمن شوي او يوازې د چين پلازمېنه بيجينګ کې ۴۴ تنه مړه شوي دي.
د چينايي چارواکو په خبره، دغه بارانونه چې له يوې اوونۍ راهيسې پيل شوي وو، پکې ۳۰۰ زره تنه اغېزمن شوي، ۲۴ زره کورونه ، ۲۴۲ پلونه او ۷۵۶ کيلو متره سرک زيانمن شوی دی.
همدې حال کې بیا د شانشي ولايت کې هم لس تنه مړه هغه مهال مړه شوي چې بس يې سېلاب يوړ.
د يادونې وړ ده چې پلازمېنه بيجينګ او ههبي ولايت کې ۳۱ تنه ورک دي او د پلټنې چارې يې جريان لري.
