کابل (کوه نور، ۳ لیندۍ ۱۴۰۴): د چین د بهرنیو چارو وزیر وانګ يي ویلي، چې د جاپان د لومړۍ وزیرې سانایه تاکایچي وروستۍ څرګندونې د تایوان په اړه «شوک ورکونکې» وې او دا غلط او په ښکاره توګه استول شوې پیغام دی.
رویټرز د یکشنبې په ورځ راپور ورکړی، چې وانګ يي په تندو څرګندونو کې تاکایچي تورنه کړې، چې د چین له خوا پر تایوان د احتمالي برید په صورت کې د توکیو د پوځي غبرګون په اړه د هغې خبرې «یوه نادرسته او خطرناکه اشاره» ده.
بلخوا د جاپان د بهرنیو چارو وزارت د چین ادعاوې په بشپړه توګه د نه منلو وړ بللي او ټینګار یې کړی، چې سولې ته د دې هېواد ژمنتیا بدله شوې نه ده.
تاکایچي هم وروسته له هغې، چې د G20 سرمشریزه د افریقا په جنوبي هېواد کې پای ته ورسېده، ویلي، چې توکیو له چین سره د خبرو دروازه نه ده تړلې؛ خو اړین دریځونه به «په روښانه او صریح ډول» بیان کړي.
باید وویل شي، چې چین د امریکا وروسته د جاپان دویم لوی صادراتي بازار دی او یوازې په ۲۰۲۴ کال کې یې شاوخوا ۱۲۵ میلیارد ډالر جاپاني توکي وارد کړي دي.
