د نړۍوالو رسنیو د راپورونو له مخې د کولمبیا په سوېل لوېدیځ کې د پولیسو پر یوه مرکز بمي چاودنه او ډزې ترسره شوي چې له امله یې اووه تنه وژل شوي او ۱۲ نور ټپیان دي.
الجزیرې ټلویزیون نن ورځ "چهارشنبه، د جون ۱۱مه" خبر ورکړی چې یاد برید کې اووه تنه وژل شوي او ۱۲ نور ټپیان شوي دي.
د کولمبیا د پوځ او پولیسو ویاندانو د یاد برید مسوولیت پر FARC-EMC ډلې اچولی دی.
د یاد هېواد پولیسو ویلي دا برید یو پلان شوی برید و چې پکې د دوه کولمبیایې پولیسو په ګډون اووه تنه مړه او ۱۲ نور ټپیان شول.
د یادونې وړه ده چې دوه ورځې وړاندې هم کولمبیایې سناتور او د یاد هېواد د ۲۰۲۶ کال د ولسمشریزو ټاکنو لپاره نوماند میګویل اوریب توربي په "بوګوټا" د یوې ټاکنیزې غونډې پر مهال د شا لخوا په درې مرمیو ویشتل شوی و.
