د ملګرو ملتونو اړوند له ماشومانو د ملاتړ صندوق (یونیسف) اعلان کړی، چې د پرلهپسې بریدونو او سختې یخنۍ له امله د اوکراین ماشومان د جګړې تر ټولو سخت ژمی تېروي.
یونیسف د جمعې په ورځ، د جنورۍ ۱۷مه، پر ایکس پاڼه لیکلي، اوکراین کې میلیونونه کورنۍ له څو ورځو راهیسې د تودوخې له سیستم، برېښنا او اوبو بېبرخې دي او د ماشومانو لپاره وضعیت ډېر سخت شوی دی.
یاد سازمان د استوګنیزو سیمو او بنسټیزو تأسیساتو پر وړاندې د بریدونو د سمدستي درولو غوښتنه کړې ده؛ هغه تأسیسات، چې ماشومان او کورنۍ یې د ورځني ژوند او حیاتي خدمتونو ته د لاسرسي لپاره اړتیا لري.
دا په داسې حال کې ده چې د روسیې او اوکراین ترمنځ جګړه لا هم روانه ده او د جګړې د پای ته رسولو لپاره روانې خبرې تر اوسه کومې پایلې ته نه دي رسېدلې.
د اوکراین ولسمشر ولادیمیر زلنسکي هم ویلي، چې هیله لري راتلونکې اوونۍ له متحده ایالاتو سره د روسیې پر ضد د جګړې د پای ته رسولو د یوې طرحې په اړه هوکړې ته ورسېږي.
