د اسټرالیا د بهرنیو چارو وزارت خبر ورکړی چې یاد هېواد له افغان ښځو او نجونو سره د ملاتړ په موخه پنځه میلیونه ډالر ځانګړي کړي دي.
د یاد وزارت څخه په خپره شوې خبرپاڼه کې د اسټرالیا د بهرنیو چارو وزیر پني وانګ له قوله راغلي چې دغه هېواد د افغان ښځو او نجونو له حقونو څخه پرېکنده ملاتړ کوي.
په خبرپاڼه کې راغلي چې د افغان ښځو او نجونو سره په نورو بېلابېلو برخو کې د خدماتو لپاره پنځه میلیونه نور ډالر هم ملګرو ملتونو ته ورکول شوي ترڅو د افغان ښځو او نجونو بېړنۍ اړتیاوې پوره کړي.
اسټرالیا له افغان ښځو او نجونو سره دغه مرسته په داسې حال کې کوي چې د ملګرو ملتونو د بشري مرستو همغږي کوونکي"اوچا" موده مخکې ویلي و چې په افغانستان کې له جنورۍ-مارچ میاشتې پورې د بودیجې کمښت د خوړو، سرپنا، زده کړو او روغتیا خوندیتوب لړۍ له ستونزو سره مخ کړې ده.
