د افغانستان بانک پر خپله اېکس پاڼه ليکلي، ياد بانک غواړي چې سبا يکشنبه د ازادی داوطلبي له لارې پنځلس ميليونه امريکايي ډالر د ليلام په ډول وپلوري.
ياد بانک له سوداګريزو بانکونو، صرافي او د پولي خدمتونو له شرکتونو غوښتي ترڅو په دغه داوطلبي کې ګډون وکړي.
د سرچينې په خبره، په داوطلبي کې ګډون کوونکي بايد خپل حسابونه د ليلام د ورځې تر پايه تصفيه کړي.
د ياد بانک په خبره، د اسعارو په ليلام کې قسمي تسويې ته اجازه نه ورکول کيږي او په داوطلبي کې ګټوونکي شرکتونه اړ دي چې د خپل ذمت پیسې په نغدي ډول په ټاکلې موده کې د افغانستان بانک ته وسپاري.
د يادونې وړ ده چې تېره اوونۍ هم د افغانستان بانک پنځلس ميليونه امريکايي ډالر د افغانيو د ارزښت ساتلو په موخه ليلام کړي وو.
