د قطر په پلازمېنه دوحه کې د ملګرو ملتونو په کوربتوب د هېوادونو د ځانګړو استازو ناستې دویمه او وروستۍ ورځ پيل شوه.
د راپورونو له مخې، په نننۍ غونډه کې د ملګرو ملتونو د ځانګړي استازي ټاکل، چې د دې ناستې مهمه برخه وه، نه ترسره کېږي.
ملګرو ملتونو ویلي، چې د دغه سازمان سرمنشي به په ځایي وخت له غرمې وروسته په درېيو بجو د ځانګړو استازو په ناسته کې د بندو دروازو تر شا وینا وکړي.
د دوحې ناستې پر لومړۍ ورځ یعنې پرون ټول بحثونه دوه اړخیزه او څو اړخیزه وو.
د شپې ناوخته د ملګرو ملتونو سرمنشي انتونیو ګوتېرېش په مشرۍ د سیمې له ځانګړو استازو سره ناسته تر سره شوه.
د ګوتېرېش په دغه ناسته کې د سیمې له هېوادونو ورهاخوا د اروپايي ټولنې، امریکا او د اسلامي هېوادونو د همکاریو سازمان استازو هم برخه اخیستې وه.
ځینو ديپلوماتانو ویلي، د ملګرو ملتونو له مشر سره خبرې پر دې ورټولې وې چې د سیمې هېوادونه څه ډول له افغانستان سره په تعامل کې ګډ دریځ غوره کړي.
په دې ناسته کې د ملګرو ملتونو د سرمنشي انتونیو ګوتېرېش په ګډون د سیمې نږدې د ۲۵ هېوادونو او بنسټونو استازي برخه لري.
په دوحه کې د سرپرست حکومت سفیر ډاکټر نعیم رسنیو ته ویلي، په دغه ناسته کې یې ځکه ګډون نه دی کړی چې نه غواړي په دې ناسته کې تشریفاتي ګډون ولري.
