د کانونو او پټروليم وزارت وياند همايون افغان پر خپله اېکس پاڼه ليکلي، ځينو افغان پانګوالو د کانونو او پټروليم وزارت له سرپرست وزير سره په ليدنه کې لېوالتيا ښودلې ترڅو په افغانستان کې د ۱۲۰ ميليونه امريکايي ډالرو په ارزښت د نفتو د تصفيې کارخونه جوړه کړي.
سرچينه زياتوي، دغو سوداګرو په افغانستان کې روان وضعيت د پانګونې لپاره مناسب بللی دی.
د کانونو او پټروليم وزارت سرپرست په دغه ليدنه کې ويلي، هېواد کې د نفتو پرېمانه زېرمې شته او حکومت هڅه کوي ترڅو استخراج کېدونکي نفت په کور دننه تصفيه کړي.
نوموړي د امو سينديزې حوزې ته په اشارې ويلي، د نفتو د استخراج کچه د پراختيا په حال کې ده او په ورځني ډول ترې ۱۳۵۰ ټنه خام نفت استخراج کيږي چې د روان کال تر پايه به يې کچه ۳۰۰۰ ټنو ته لوړه شي.
نوموړي همداراز د خامو نفتو د تصفيې خونې جوړول په هېواد کې اړينه بللې او دغه سوداګرو ته يې د هر اړخيزې همکاري ډاډ ورکړی دی.
د يادونې ده چې سرپرست وزير دغه راز سوداګرو ته د هرات په نفتي حوزه کې د پانګونې بلنه هم ورکړې ده.
