ايراني رسنيو خبر ورکړی چې د دغه هېواد د اوسپنې پټلۍ اداره چمتو ده چې د افغانستان سوداګریز توکي ترکيې ته ولېږدوي.
د ايران د اوسپنې پټلۍ ادارې چمتوالی ښودلی چې د افغانستان لس واګونه «شوکاڼی» ترکيې ته واستوي.
دغه سوداګریزه محموله، د اپريل له ۲۱مې تراوسه د ايران شمتېغ سرحدي سيمه کې ايسار پاتي دي.
د ايران د اوسپنې پټلۍ اداره داسې مهال د لېږد لپاره چمتوالی ښيي چې تېره اونۍ د ايران د دولت وياند بهادر علي ويلي وو چې افغانستان دغه هېواد ته يوه برخه حقابه ورکړې او د سيستان سيمې ته یې اوبه ور پرېښودل شوې دي.
د يادونې ده چې د اپرېل په ۲۱مه افغانستان په لومړي ځل د هرات - خواف رېل پټلۍ له لارې سوداګريزه محموله ترکيې ته صادره کړه چې د ايران د روزنک اډې ته په رسېدو يې د مخکې تګ مخنيوی وشو.
