د ایرنا خبرې اژانس يوه خبر پاڼه کې ویلي چې د عبدالله تاجک په نوم یو افغان د یاد هیواد د کرج په قزل حصار زندان کې او د عبدالمهدي رشاد امیري په نوم بل افغان د ایران په قم مرکزي زندان کې اعدام شوی دی.
ددغو افغانانو جرم نه دی مشخص شوی خو له دې مخکې په یاد هیواد کې د نشه یې توکو، وژنو او ځینو نورو غټو جرمونو په تور افغانان اعدام شوي و
د یاد هیواد د بشري حقونو سازمان(حالوش) د معلوماتو په يوه اساس د روان ۲۰۲۴ زیږدیز کال د پیل راهیسې په دغه هیواد کې ددې دوه افغانانو په ګډون ۶۳ افغانان د بېلابېلو جرمونو په تور اعدام شوي دي.
دغه دوه تنه داسې مهال اعداميږي چې څه موده وړاندې د ايران هېواد عدليې وزارت يو پلاوی کابل ته راغلی وو او دلته يې له بېلابېلو چارواکو سره ايران کې د افغان بنديانو د وضعیت او افغانستان ته د لېږد په تړاو خبرې کړې وې.
دوې همداراز ویلي وو، افغانستان ته به پنځه سوه زندانیان چې ايران مې بندیان دي واستوي.
