بهرنيو چارو وزارت پر خپله اېکس پاڼه ليکلي، د دغه وزارت سیاسي مرستیال شېر محمد عباس ستانکزي کابل کې افغانستان لپاره د برېتانيا شارزدافير رابرټ چټرټن ډيکسن سره ليدلي دي.
ستانکزي د سرپرست حکومت واک ته له رسېدو راهيسي افغانستان سره د برېتانیا له بشري مرستو مننه کړې د دواړو هېوادونو ترمنځ يې د بشري او سیاسي اړیکو په پياوړتيا ټينګار کړی دی.
ورته مهال بیا رابرټ چټرټن هم د سرپرست حکومت له چارواکو سره په ليدلو خوښي څرګنده کړې او دغه راز يې د نشه يي توکو سره د مبارزې په برخه کې د سرپرست حکومت هڅې ستايلې دي.
ده همداراز ویلي هېواد به يې له افغانستان سره بشري مرستو ته دوام ورکړي.
نوموړي همداراز ژمنه کړې چې هېواد کې به یې د افغان وګړو لپاره قونسلي خدماتو پيل شي.
