د بهرنيو چارو وزير نن کابل کې له خپل پاکستاني سیال سره ليدلي دي.
له ياد وزارت په يوه خپره شوې خبر پاڼه کې راغلي، دغه ليدنه کې د دواړو لوريو ترمنځ پر اقتصادي، سیاسي، سوداګري، ټرانزیټ، سترو پروژو او د کډوالو پر موضوع خبرې شوي دي.
د بهرنيو چارو وزير امير خان متقي ويلي، افغانستان د خپل متوازن سیاست له مخې د پاکستان په ګډون له ټولې نړۍ سره مثبتې او په احترام ولاړې اړيکې غواړي.
نوموړي ويلي، افغانستان لېواله دی چې له پاکستان سره سوداګري، ترانزيت او د لويو پروژو عملي کولو ته پراختيا ورکړي.
متقي له پاکستاني لوري غوښتي دي چې د شته ستونزو د هواري په موخه دې اقدامات وکړي.
نوموړي دغه راز له پاکستان غوښتي چې له خپل هېواد دې د کډوالو د اېستلو پر مهال د هغوي حقوق نه ضايع کوي.
همدې حال کې بيا د پاکستان د بهرنيو چارو وزير له افغانستان سره د دوه اړخيزه سوداګري او ترانزيت د پراختيا د چمتوالي خبر ورکړی دی.
نوموړي ژمنه کړې چې په دې برخه کې به اسانتياوې هم راولي.
دغه ليدنه کې د ګډې همکاري، د ويزو پر ډېروالي او اسانتيا، زراعت او نورو برخو پر پراختيا هم خبرې شوي دي.
ياده دې وي چې کابل نن د چين او اسلام اباد د درې اړخيزې ناستې کوربه وو.
