د ټولګټو چارو وزارت وياند محمد اشرف حق شناس پر خپله اېکس پاڼه ليکلي، د روانې سرطان مياشتې له ۱۵ مې نېټې تر ۲۱ نیټې د هېواد د اوسپنې پټلۍ له لارو ۷۷ زره او ۵۰۶ مټريک ټنه انتقالات ترسره شوي دي.
د ده په خبره د يادو انتقالاتو له جملې ۶۵ زره او ۳۲۲ ټنه د حيرتان بندر له لارې، ۵۶۸۱ ټنه د اقينې بندر له لارې او ۶۵۰۳ ټنه بيا د تورغونډۍ بندر له لارې ترسره شوي دي.
نوموړي ويلي، په دغه انتقالاتو کې نفتي او غير نفتي توکي شامل دي چې هېواد ته وارد او همداراز له هېواد څخه صادر شوي دي.
سرچينه زياتوي، په دغه انتقالاتو کې ۱۷۴۱ ټنه صادرات دي چې ډېری يې وچې مېوې او د انارو جوس دی.
حق شناس دغه راز ويلي، مسوولان هڅه کوي ترڅو د لا زياتو انتقالاتو لپاره مناسب شرایط او زمينه برابره کړي.
