احصایې او معلوماتو ملي ادارې خبر ورکړی چې روان ۱۴۰۳ کال کې ۶۶۹,۷ میلیونه ډالرو په ارزښت صادرات او د درې میلیارده او ۲۵۴,۴ میلیونه ډالرو په ارزښت واردات شوي دي.
خبرپاڼه کې راغلي چې د ۱۴۰۲ کال په اوږدو کې د صادراتو ارزښت ۶۳۴,۸ میلیونه ډالره و چې د روان کال په پرتله په دغه صادراتو کې ۳۴,۹ میلیونه ډالره ډېروالی راغلی دی.
خبرپاڼه زیاتوي روان کال د صادارتي توکو په ډله کې وچه او تازه میوه ۳۲۱,۹ میلیون ډالرو په ارزښت تر نورو ډېره ونډه لري همداراز د ۷۹,۳ میلیونه ډالرو په ارزښت شنه سبزې، ۶۷,۳ میلیونه ډالرو په ارزښت طبي بوټي او د ۳۵,۲ میلیونه ډالرو په ارزښت معدني توکو دویم، دریم او څلور مقام خپل خپل کړی دی.
یادې ادارې همداراز لیکلي چې د روان کال په یاده موده کې د هېواد د وارداتي توکو په ډله کې نفتي توکي او روغنیات د ۶۶۷,۲ میلیونه ډالرو په ارزښت ډېره برخه لري او ورپسې ماشینونه، ترانسپورټي وسایط او پرزې د ۴۵۰,۱ میلیون ډالرو په ارزښت، غنم او د غنمو وړه د ۲۳۴,۱ میلیون ډالرو په ارزښت او همدارنګه منسوجات د ۱۱۷ میلیونه ډالرو په ارزښت دویم، دریم او څلورم ځایونه خپل کړي دي.
له بله پلوه د روان کال په جریان کې وچه او تازه مېوه د ۴۸,۱ سلنې او شنه سبزې د ۱۱,۸ سلنې په لرلو سره د هېواد په صادراتو کې تر ټولو ډېره برخه لري.
د یادونې ده چې د تور غونډۍ، اسلام کلا ګمرکونو او د هرات ولایت مرکز د ۲۵ سلنې، د کندهار ښار ګمرک او د یاد ولایت د سپین بولدک ۱۵,۶ سلنې او د مزار شریف ګمرک په ۱۴,۲ سلنې سره د هېواد په وارداتي او صادراتي بهیر کې تر ټولو ډېره ونډه اخیستې وه.
