کابل (کوه نور ۲۶ سرطان ۱۴۰۴):
د اسلامي امارت مرستیال ویاند حمدالله فطرت وايي، د بریتانیا له خوا د افشا شویو پخوانیو افغان سرتېرو اسنادو ته اړتیا نشته او ټول اسناد له امنیتي ادارو له پخوا موجود وو.
هغه وايي، د اسلامي امارت مشر ټولو پخوانیو پوځیانو ته عمومي بښنه کړې او هېڅوک به د خپلو تېرو کړنو له امله ونه نیول شي.
د فطرت په خبره، استخباراتي ادارې د افشا شوي نوملړ پر بنسټ د چا د نیولو یا محاکمه کولو پلان نه لري او دا ډول راپورونه له واقعیته لرې بلل شوي دي.
نوموړی زیاتوي، نه له چا غچ اخلي او نه د چا د وېرولو هڅه کوي.
تر دې وړاندې برېتانیا ویلي وو، چې د دوی د یوې محکمې له لوري د افشا شویو اسنادو له امله د دوی یو شمېر پخواني افغان همکاران تر څار لاندې دي.
