د رياست الوزراء اداري مرستيال عبدالسلام حنفي ویلي، چې افغانستان د تايوان مقابل کې د چين ملاتړ کوي او د يوه کمربند ـ يوه لار پروژه تاييدوي.
هغه د چين له نوي سفیر سره د کتنې پر مهال ویلي، افغانستان هڅه کوي د مختلفو دهليزونو له لارې له دې پروژې سره وصل شي.
يو کمربند ـ يوه لار د چين يوه ستره پروژه ده چې د پورونو په بدل کې د نړۍ اويا هېوادونو په تېره بيا په اسيا او افريقا کې لويې لارې، بندرونه، اورګاډي، پلونه او هوايي ډګرونه جوړوي.
امريکا دغه پلان په اسيايي او افريقايي هېوادونو کې د چين د نفوذ د يوې وسيلې په توګه ګڼي.
سلام حنفي همدا راز ويلي، چين د تاريخ په اوږدو کې له افغانستان سره ښې اړیکي پاللې دي او اسلامي امارت يې د دوام هيله لري.
نوموړي زياته کړې، اسلامي امارت پاليسي د متقابل احترام او د يو بل په چارو کې د نه مداخلې پر اساس له ټولو ګاونډيو په ځانګړي ډول چين سره د دوه اړخيزه اړيکو دوام دی.
حنفي ويلي، چې د افغانستان خاوره د هيچا امنیت پر ضد نه کارول کېږي او رامنځته شوو مناسبو شرایطو ته په اشارې يې چينايي او افغان سوداګرو ته د سوداګريزو فعاليتونو د لا زياتو اسانتیاوو په رامنځته کولو ټينګار کړی دی.
ارګ وايي، د چين نوي سفر وویل، چې د اسلامي امارت تر حاکميت وروسته افغانستان په ټولو برخو کې ښه پر مخ روان دی. د چين سفير د سرتاسري امنيت ستاينه کړې او ويلي یې دي، چې د متقابل احترام او نه مداخلې پاليسۍ پر اساس له اسلامي امارت سره په مختلفو برخو کې مخته تګ کوو.
