د افغانستان بانک پر خپله اېکسپاڼه لیکلي، سبا دوشنبه د افغانیو ارزښت ساتلو په موخه د داوطلبۍ له لارې ۱۵ میلیونه امریکايي ډالر د لیلام په ډول پلوري.
یاد بانک له سوداګریزو بانکونو، صرافیو او د پولي خدمتونو له شرکتونو چې په شرایطو برابر وي غوښتي چې په دې داوطلبۍ کې ګډون وکړي.
د سرچینې په وینا، د داوطلبۍ ګټونکي اړ دي څو خپل حسابونه د لیلام ورځې تر پایه تصفیه کړي.
د بانک د مسولینو په خبره، د اسعارو د لیلام په داوطلبۍ کې د معاملاتو قسمي تسویې ته اجازه نه ورکول کیږي او د داوطلبۍ ګټونکي اړ دي چې د خپل ذمت د قیمت پیسې په یو ځل په نغدي ډول په ټاکلي موده کې د افغانستان بانک ته وسپاري.
د یادونې وړ ده چې له دې وړاندې هم د افغانستان بانګ د افغانیو د ارزښت ساتلو په موخه میلیونونه ډالر لیلام کړي دي.
