د افغانستان بانک پر خپله اېکسپاڼه د تېر ۱۴۰۲ لمريز کال فعاليتونه اعلان کړي.
ياد بانک ويلي، په تېر کال کې د افغانيو د ارزښت او د انفلاسیون کنټرول کړي دی.
د سرچينې په خبره په همدې موده کې يې د خلکو پر امانتونو محدوديتونه کم کړي او همداراز يې نوې بانکي نمايندګيانې هم خلاصې کړي دي.
د ياد بانک په خبره د صرافي خپل کاره ماشينونه ATM يې هم فعال کړي دي.
سرچينه زياتوي د افغانستان د اقتصادي اړتيا سره سم يې نوي بانک نوټونه هم چاپ کړي دي.
د دغه بانک د معلوماتو له مخې، په ياده موده کې يې ۵.۲ مليارده افغانۍ مندرس بانک نوټونه سوځولي او پر ځای يې نوي بانک نوټونه بازار ته عرضه کړي دي.
ياد بانک ويلي، د راکړې ورکړې لپاره يې بین البانکي سیستم بیا رغولی او همداراز يې د کارکوونکو د استخدام پروسه هم برېښنایي کړې ده.
د يادونې وړ ده، چې د افغانستان بانک د افغانيو د ارزښت ساتلو په موخه په دې وروستيو کې ميليونونه ډالر ليلام کړي دي.
