د ریاست الوزرا اقتصادي معاونیت په یوه خبرپاڼه کې ويلي چې د دغه رياست سرپرست ملا عبدالغني برادر د یوه لوړ پوړي پلاوي په مشرۍ ازبکستان هېواد ته تللی دی.
په خبرپاڼه کې راغلي د یاد سفر په ترڅ کې چې مشري یې ملا عبدالغني برادر کوله نن ماذیګر د ازبکستان هېواد د لومړي وزیر له مرستیال جمشېد خواجه یوف سره کتل شوي دي.
په دغه لیدنه کې د سوداګریزو او ترانزیټې اړیکو او همداراز په افغانستان کې د ازبکستاني پانګوالو پر پانګونه خبرې اترې شوې دي.
خبرپاڼه کې راغلي د ازبکستان هېواد د لومړي وزیر مرستیال پخپلو خبرو کې ویلي چې تاشکند چمتو دی ترڅو د دواړو هېوادونو ترمنځ پر پوله یو ګډ سوداګریز زون رامنځته کړي.
خواجه یوف همداراز ویلي چې ازبکستاني پانګوال چمتو دي چې د نفتو او ګازو د کشف او استخراج په برخه کې له سرپرست حکومت سره همکارې وکړي.
د ریاست الوزرا اقتصادي مرستيال د جمشېد خواجه یوف له طرحو هرکلی وکړ او ډاډ یې ورکړ چې سرپرست حکومت به په یادو برخو کې ورسره همکارې وکړي.
