د صنعت او سوداګرۍ وزارت په يوه خبر پاڼه کې ويلي، د افغانستان او ازبکستان ترمنځ د سوداګريز پیوستون غونډه جوړه شوې.
د خبر پاڼې له مخې، په دغه غونډه کې د ياد وزارت مرستيال قدرت الله جمال، کابل کې د ازبکستان سفير او د دواړو هېوادونو پانګوالو برخه اخيستې وه.
د ياد وزارت مرستيال ويلي، له ازبکستان سره ښې اقتصادي اړيکې غواړي او د دغه هېواد سوداګر کولای شي د هېواد په پنځه زونونو کې د توکو د پروسس په برخه کې پانګونه وکړي.
نوموړي همداراز ويلي، سرپرست حکومت له ټولو ګاونډيو سره د سوداګريزو اړيکو غوښتونکی دی.
ورته مهال د ازبکستان سفير په افغانستان کې پانګونه د دواړو هېوادونو ترمنځ د اړيکو د پياوړتيا بللې او ويلي يي دي، چې مونږ له افغانستان سره اقتصادي اړيکې پاللي.
ده همداراز دوه اړخيزه سوداګريزې اړيکې د دواړو هېوادونو ترمنځ د باور ډېروالی ښودلی او دغه چاره يې د اقتصادي حالت د پياوړتيا لار بللې.
د يادونې ده چې سرپرست حکومت افغانستان د پانګونې لپاره مساعد ګڼي او له پانګوالو غواړي چې په دغه هېواد کې پانګونه وکړي.
