ټرانسپورټ او هوايي چلند وزارت وايي، د کابل - شانګهای تر منځ هوايي دهلېز نن «یکشنبه د اکتوبر ۸مه» پرانېستل شو.
دغه وزارت په یوې خبرپاڼه کې ويلي، د یاد هوايي دهلېز له لارې به د اریانا افغان او کام ایر هوايي شرکتو نو له لوري چين هېواد شانګهای ښار ته د زڼغوزيو صادرات پیل شي
خبرپاڼه زياتوي، د دې دهلېز په پرانېستو سره به د هوايي ټرانسپورټ له لارې د هيواد سوداګريزه پراختيا رامنځته او کورني توکي به په نړيوال بازار کې د افغانستان په نوم پلورل کېږي.
د ریاستالوزراء اقتصادي مرستیال ملا عبدالغني برادر د دې هوايي دهلېز د پرانېستې پر مهال ویلي: «هغه هېوادونه چې له افغانستان سره د دوه اړخیزو اقتصادي او سوداګریزو اړیکو پراختیا ته ژمن دي.»
هغه زياته کړې، چې د افغانستان اقتصادي وضعيت د پرمختګ پر لوري روان دی او دا د سوداګرو او صنعت کارانو د هڅو پايله ده.
نوموړي په کور دننه او بهر مېشت افغان پانګوالو غږ کړی، چې په افغانستان کې دې پانګونه وکړي.
ملا برادر ويلي، د افغانستان اسلامي امارت د ګاونډیو، سیمې او نړۍ له هېوادونو سره د متقابل احترام او تعامل پربنسټ ښې اړيکې غواړي، په ګاونډیو هېوادونو کې د افغان مهاجرینو سپکاوی دوی ته د منلو وړ نه دی
هغه له نورو هېوادونو د متقابل احترام غوښتنه کړې ده.
