د کانونو او پټروليم وزارت وياند، همايون افغان پر اېکس ټولنیزه پاڼه ليکلي، سبا به د هرات د سیمنټو پروژه په کور دننه له يوه پانګوال سره لاسليک شي.
د هرات فابريکه د قندهار او جبل السراج وروسته دريمه فابريکه ده، چې د سمنټو د استخراج په موخه خصوصي سکتور ته ورکول کيږي.
افغان ويلي، د دې درې واړو پروژ د سمنټو کلنی توليد به ۴ - ۵ مليونو ټنو پورې ورسيږي.
د ده په خبره د هېواد کلنۍ اړتيا ۳ - ۴ مليونه ټنو پورې ده، چې پاتې برخه به يې بهرنيو هېوادونو ته صادر کړي.
هغه همدا راز ويلي، د لوګر او جوزجان سمنټ هم اعلان ته سپارل شوي دي.
نوموړي زياته کړې، چې داخلي سمنټ به د هېواد په ټولو لويو پروژو کې د استفادې وړ وګرځي.
تېره ورځ د جبل السراج د سمنټو فابريکې د استخراج چارې له يوه قطري شرکت سره لاسليک شوې.
دغه شرکت به د جبل السراج د سمنټو فابريکه کې ۲۲۰ ميلیونه دالره پانګونه کوي.
دې پروژه کې شاوخوا ۵ زرو کسانو ته د کار زمينه برابريږي او د قرارداد وخت یې ۳۰ کاله دی.
افغانستان ته اوس مهال ډیری سیمنټ له ايران او پاکستان څخه راځي. په کور دنننه یو شمېر پانګهوال د بهرنيو سمنټو له لوړ قيمت او ټيټ کيفیت څخه شکايت کوي. د دوی په وینا، که د هېواد دنننه د سمنټو توليد زيات شي، له یوه اړخه به خلکو ته د کار زمينه برابره او له بله اړخه به افغانستان د نورو هېوادونو له احتياج خلاص شوی وي.
