د کليو د بيا رغونې او پراختيا سرپرست وزير ملا محمد يونس اخوندزاده کابل کې د چين له سفير جاوشينګ او مل پلاوي سره ليدلي دي.
د چين سفير د واخان او چين ترمنخ جوړیدونکي سرک ته په اشارې ويلي، هېواد یې د پرمختيايي او بنسټيزو پروژو په برخه کې له افغانستان سره همکاري ته چمتو دی.
ورته مهال بیا د کليو د بيا رغونې او پراختيا سرپرست وزير له سرپرست حکومت سره د چين له سیاسي او اقتصادي همکاري مننه کړې او ويلي يې دي په نږدې راتلونکي کې به افغانستان له چين سره ونښلول شي.
نوموړي ويلي، دغه سرک به د افغانستان او چين ترمنځ اقتصادي پياوړتيا رامنځته او همداراز به چين له منځني آسيا سره ونښلول شي.
د يادونې ده چې چين دوه ورځې وړاندې کابل کې د ۷۱ ميليونه ډالرو په ارزښت د ۵۶ استوګنيزو بلاکونو چارې پيل کړې چې په راتلونکي درې کلونو کې به بشپړې شي.
