عامې روغتیا وزارت د روغتیا نړیوال
سازمان هغه راپور رد کړ، چې په کې ویل شوي وو، د زړه ناروغۍ له امله هر کال ۴۰ زره افغانان خپل ژوند له لاسه ورکوي.
د یاد وزارت لهخوا په خپره شوې اعلامیه کې راغلي، چې د روغتیا نړیوال سازمان له لوري خپاره شوي ارقام کره نه دي.
اعلامیه زیاتوي، چې په ۲۰۲۴ کال کې شاوخوا ۲۰ زره د زړه ناروغان په روغتونونو کې بستر شوي وو؛ خو دا شمېر د مړینو نه، بلکې د بستر شویو ناروغانو دی.
عامې روغتیا وزارت له نړیوالو ادارو غوښتنه کړې، چې خپل معلومات دې له دغه وزارت سره په همغږۍ خپاره کړي، څو د ناسمو معلوماتو د خپرېدو مخه ونیول شي.
د یادونې وړ ده، چې د روغتیا نړیوال سازمان په یوه تازه راپور کې په افغانستان کې د غیر ساري ناروغیو له امله د مړینې د زیاتوالي په اړه اندېښنه ښودلې او ویلي یې دي، چې هر کال د زړه ناروغۍ له امله ۴۰زره افغانان خپل ژوند بایلي.
د یاد سازمان له لوري په خپاره شوي راپور کې راغلي، چې د افغانستان خلک له جدي روغتیايي ګواښونو سره مخ دي او غیر ساري لکه د زړه، شکر، سرطان او تنفسي ناروغیو د مړینې کچه ورځ تر بلې لوړېږي.
