د روسیې د بهرنيو چارو وزير سرګي لاوروف د مسکو مشورتي فارمټ د اوومې ناستې پيل کې ويلي، افغانستان کې د درېيمو هېوادونو له لوري پوځي تاسيسات د منلو وړ نه دي.
هغه ټينګار کړی، چې نه يوازې افغانستان بلکې د افغانستان ګاونډيو هېوادونو کې هم ورته دغه ډول تاسيسات د منلو وړ نه دي.
نوموړی دغه څرګندونې داسې مهال کوي چې د متحده ايالاتو ولسمشر ډونالډ ټرمپ ويلي وو، له هرې لارې چې وي، افغانستان کې د باګرام پوځي او هوايي اډه بېرته ترلاسه کوي.
لاوروف دغه ناسته کې زياته کړې چې اسلامي امارت د نشه يي توکو پر وړاندې کافي مبارزه کړې ده.
نوموړي همداراز ډاډ ورکړی چې هېواد یې چمتو دی، چې افغانستان سره د داعش خلاف مبارزه کې همکاري وکړي.
دغه ناسته چې د افغانستان د بهرنيو چارو وزير مولوي امیر خان متقي په ګډون د پاکستان، ايران، چين، تاجکستان، ازبکستان، قرغيزستان، ترکمنستان او بلاروس هېوادونو استازو پکې ګډون درلود، د روسيې په کوربه توب شوې ده.
ياده ناسته کې د نورو موضوعاتو ترڅنګ افغانستان سره پر سوداګريزې همکارۍ هم خبرې شوې ده.
