د اوبو او انرژۍ وزارت پر خپله اېکسپاڼه خبر ورکړی چې د پلخمري له الوان دښتې تر کابل ارغندي سبسټېشن پورې د ۵۰۰ ولټ برېښنا لېږد مزي د غځولو چارې ۷۵ سلنه بشپړې شوې دي.
په خبرپاڼه کې راغلي دغه پروژه د اوبو او انرژۍ وزارت له مهمو پروژو څخه ده چې چارې یې تر اوسه ۷۵ سلنه پر مخ تللې دي چې له تکمېدلو سره به یې د هېواد ۱۲ ولایتونو ته برېښنا ولېږدول شي.
د سرچینې په وینا دا مهال د نوموړې پروژې د پونډېشن، پایو نصبولو او د لین کشۍ کارونه په تېزۍ سره دي او ویل کېږي چې له ټاکل شوي مهال ویش سره سم به یې کارونه سرته ورسېږي.
دغه پروژه چې د پلخمري له الوان دښتې نیولي تر کابل ارغندي سبسټېشن پورې غځېدلې ۲۳۸ کیلو متره اوږدوالی لري چې د کارونو په سرته رسېدلو سره به یې د کابل، بغلان، پروان، میدان وردګ، غزني، زابل، کندهار، ننګرهار، لغمان، لوګر، پکتیا او خوست ولایتونو ته په منظم ډول برېښنا ولېږدول شي.
