د احصایې او معلوماتو ملي اداره وایي، افغانانو ته د الکترونیکي تذکرو د وېش لړۍ په برخه کې د پراختیا لپاره په متحده عربي اماراتو کې د تذکرو د وېش څانګه فعالوي.
ورته مهال یادې ادارې د متحده عربي اماراتو د ابوظبۍ ښار ته د د آسان خدمت تر چتر لاندې د الکترونیکي تذکرو د وېش ټیم لېږلي چې په نږدې ورځو کې به خپل فعالیتونه پیل کړي.
د دغه ملي ادارې عمومي رییس وایي، هڅه کوي ترڅو په کور دننه او بهر ټول افغانانو په اسانۍ سره الکترونیکي تذکرې ترلاسه او له ګټو یې برخمن شي.
نوموړي د الکتروني تذکرو د وېش څانګې فعالېدل په یاده برخه کې مهم ګام بللي.
د یادولو وړ ده چې د احصایې او معلوماتو ملي ادارې د بهرنیو چارو وزارت سره په بهرنیو هېوادونو کې د مېشتو افغانانو د هویت د تثبیت او د الکترونیکي تذکرو د وېش، له وېش وروسته خدمتونو، زېږون کارتونو او د مړینې د پارچو د وېش په تړاو د تېر ۱۴۰۲ لمریز کال د سلواغې په ۴مه نېټه هوکړهلیک لاسلیک کړی و چې پر اساس به یې په نږدې راتلونکي کې په ایران او ځينې نورو هېوادونو کې هم د دې الکترونیکي تذکرو وېش څانګې فعالې شي.
