د ننګرهار د اقتصاد رییس د يو خبري کنفرانس پر مهال ویلي، یاد ولايت کې تېر کال د کورنيو او بهرنيو موسساتو په ۷۶ ميلیونه، ۴۱۰ زره او ۳۰۰ امريکايي ډالرو مالي لګښت په بېلابېلو برخو کې ۲۱۱ پروژې پيل شوې چې له جملې يې ۱۲۱ بشپړې شوې او د ۹۰ پروژو چارې جريان لري.
د نوموړي په وینا، تېر کال ملي بوديجې څخه په دې ولايت کې د ۳۰۲ ميليونه افغانيو په مالي لګښت ۱۳ پروژې پلې شوي دي او سږکال د دوه ميليارده افغانيو په ارزښت ۱۵۴ پروژې وړانديز شوې چې له منظورېدو وروسته به يې عملاً چارې پيل شي.
د معلوماتو له مخې، دغه ولایت کې ۱۵۷ موسسې فعاليت کوي چې له ډلې يې ۴۷ بهرنۍ او ۱۱۰ داخلي دي او په دې وروستيو کې ۳۰ نورو کورنيو او بهرنيو موسسو تازه فعاليت پيل کړی.
د یادونې وړ ده چې تېر کال په یادو پروژو کې ۱۳زره ۵۰۰ کسانو ته لنډ مهاله او اوږدمهال کاري او د مېرمنو په ګډون يې سلګونه کسانو ته د حرفوي زده کړو زمينې برابرې کړي دي.
