د ننګرهار د کرنې اوبو لګولو او مالدارۍ ریاست خبر ورکړی چې سږکال به یاد ولایت کې ځمکي توتان د تېرکال په پرتله ډېر حاصل ورکړي چې د اټکل له مخې به ترینه ۴۸۰ مټریک ټنه حاصلات تر لاسه شي.
ددغه ریاست ویاند اجمل سبحاني له رسنیو سره په خبرو کې ویلي چې ځمکي توتان د کوکنارو ښه بدیل دی او د پراختیا لپاره یې د یاد ریاست د مسوولانو هڅې دوام لري.
د سبحاني په خبره ځمکي توتان د ننګرهار په دره نور، خوږیاڼو، سره رود، کوټ او نورو ولسوالیو کې پر ۳۶۵ جریبه ځمکه کرل شوي چې د حاصلاتو لپاره یې دوی خوښ دي.
نوموړي ویلي دغه توتان چې په ۳۶۵ جریبه ځمکه باندې کرل شوي دي د اټکل له مخې به ترینه ۴۸۰ مټریک ټنه حاصلات ترلاسه شي.
د ننګرهار د کرنې او اوبو لګولو ریاست د ویاند د مالوماتو په اساس په یاد ولایت کې تېرکال په پر ۲۳۵ جریبه ځمکه کې ځمکي توتان کرل شوي و چې ۳۱۷ مټریک ټنه حاصلات ور څخه تر لاسه شوي وو.
بلخوا په ننګرهار کې د ځمکي توتانو کروندګر د دغه توتانو کرلو ته خوشحاله دي او وایې چې سږکال ددغه توتانو په حاصلاتو کې د ډېروالي راتللو ترڅنګ د ځمکي توتانو بازار هم د تېرکال پر پرتله ښه دی.
دوی له رسنیو سره په خبرو کې ویلي چې د ځمکي توتانو ګټه د نورو فصلونو پر پرتله ډېره او کارونه او لګښت یې کم دی.
په ننګرهار کې د ځمکي توتانو کروندګر له حکومته غواړي چې هېواد ته په راتلونکو ځمکي توتانو دې ګمرکي تعرفې لوړې کړې او یا دې هم هېواد کې د ځمکي توتانو د رسېدلو پرمهال دوی ته د هغې د وارداتو اجازه ورکړي.
باید وویل شي چې ننګرهار د هېواد له ولایتونو یو حاصل ورکونکی ولایت دی چې هرکال پکې په حاصلاتو کې د تېرکال په پرتله ډېروالی راځي.
