نړیوال بانک په خپل نوي راپور کې ویلي، چې افغانستان، د منځني ختیځ، شمالي افریقا او پاکستان له هېوادونو سره یو ځای، له مخ پر زیاتېدونکو ننګونو سره مخ دی؛ چې د اقلیم بدلون، د اوبو کمښت او د خوړو د نه خوندیتوب زیاتوالی پکې شامل دي.
راپور کې راغلي خوړو او کرنې په نظامونو کې بدلون کولی شي په افغانستان او د سیمې په نورو هېوادونو کې د خوړو خوندیتوب پیاوړی کړي، د کار فرصتونه زیات کړي او اقتصادي مقاومت لوړ کړي.
نړیوال بانک اټکل کړی، چې د پراخې پانګونې، د سوداګرۍ د چاپېریال د اصلاح او د خوړو د رسونې د ځنځیر له تولید څخه تر وېش پورې د عصري کولو له لارې، تر ۲۰۵۰ کال پورې د کرنې او خوړو د صنعت په برخه کې د سیمې، په ګډون د افغانستان، لپاره تر پنځه میلیونه پورې نوي کاري فرصتونه رامنځته کېدای شي.
