کابل (کوه نور، ۱۱ اسد ۱۴۰۴): د روغتیا نړۍوال سازمان "WHO" ویلي، د چیکونګیا په نوم نوی ویروس په سوېلي چین او په ځانګړې توګه د "ګوانګ دونګ" ولایت په فوشان ښار کې په چټکۍ سره خپرېږي.
یاد ولایت کې د ۲۰۲۵ کال د اګست میاشتې تر لومړۍ نېټې د "چیکونګیا" ویروس له څلورو زرو ډېرې پېښې راپور شوې دي.
د روغتیا نړۍوال سازمان ویلي، تر دې دمه ۱۱۹ نورو هېوادونو کې هم د دې ویروس مثبتې پېښې ثبت شوې دي.
د دې سازمان پر وینا، د دې ویروس د چټک خپرېدو بڼه د ۲۰۰۴-۲۰۰۵ کلونو وبا ته ورته ده چې د هند سمندر ټاپوګانو کې پیل شوه او ټوله نړۍ کې پرې لږ تر لږه یو نیم میلیون خلک اخته شول.
راپورونو کې راغلي، د دې ناروغۍ لپاره کومه ځانګړې درملنه نشته او د مچیو له چیچلو څخه د ځان ساتنې له لارې مخنیوی لکه، د جالونو او حشراتو ضد درملو کارول یې په مخنیوي کې مرسته کوي.
