کابل کې د چین سفیر ژاو شینګ د افغانستان لپاره د ملګرو ملتونو د کډوالو عالي کمېشنرۍ له استازي سره په کتنه کې ویلي، چین پلان لري چې له داخلي بې ځایه شویو افغانانو سره د ۱.۵ میلیون ډالرو مرسته وکړي.
کابل کې د چين سفارت یوه خبرپاڼه کې ليکلي چې دغه مرسته به د ملګرو ملتونو د کډوالو عالي کمېشنرۍ د پروژو د يوې برخې په توګه افغانستان کې له داخلي بې ځايه شويو کسانو سره د مرستې په موخه ولګول شي.
خبرپاڼه کې دا هم راغلي چې چين غواړي له افغانستان سره د بشري مرستو د برابرولو په برخه کې د ملګرو ملتونو د کډوالو له عالي کمېشنرۍ سره خپلې همکارۍ هم پياوړې کړي.
