د سرپرست حکومت وياند ذبيح الله مجاهد د چين د ولسمشر شي جينګ پينګ د هغو څرکندونو هرکلی کړی چې ويلي يې وو، هېواد يې چمتو دی د افغانستان د ستونزو په حل کې رغنده رول ولوبوي.
مجاهد ويلي، افغانستان هم غواړي د يو مهم اقتصادي هېواد په توګه له چين سره اړيکې ولري.
د چين ولسمشر شي جينګ پينګ بېجنګ کې يوې غونډې ته ويلي، چين د سولې لپاره خپل دريځ نه بدلوي او په خبره يې، د فلسطين او اسرايلو په جنګ کې، د روسيې او اوکراین په ناورين کې او دغه راز د افغانستان د ستونزو په حل کې رغنده رول لوبوي.
په همدې حال کې د افغانستان لپاره د چين ځانکړي استازي ويلي، نړۍوال دې د افغانانو په کلتور او کورنیو چارو کې لاسوهنه نکوي.
د يادونې ده چې چين تر دې وړاندې په رسمي ډول د سرپرست حکومت د سفير باورليک هم منلی وو.
