د خوړو نړۍوال پروګرام (WFP) ويلي، اوسمهال په ټول افغانستان کې د دولس ميليونو اړمنو له جملې يوازې يو ميليون سره مرستې کولای شي.
ياد پروګرام د دغه کار علت د کافي بوديجې کموالی ياد کړی دی.
د سرچينې په خبره، د مرستو له کموالي سره به نږدې ۱.۴ ميليون ماشومانو او ميندې به د خوارځواکي د مخنيوي په موخه اړين توکي ترلاسه نشي کړای، داسې حال کې چې په افغانستان کې د خوارځواکي ګراف مخ په لوړېدو دی.
ياد پروګرام دغه راز ويلي، د روان کال تر پايه په افغانستان کې د خپلو پروګرامونو پر مخ وړلو لپاره ۶۱۷ ميليون ډالرو ته اړتيا لري.
د يادونې وړ ده چې څو ورځې وړاندې د افغانستان لپاره د ملګرو ملتونو د بشري مرستو د همغږي دفتر (اوچا) هم د بوديجې د کموالي خبر ورکړی وو.
