د صنعت او سوداګرۍ وزارت پر خپله اېکسپاڼه ليکلي، د روسيې هېواد نړيوالو شرکتونو په افغانستان کې د بریښنا، ګاز، ډيجيټل حکومتولۍ، د هېواد د امنيت د پياوړتيا لپاره د سيستمونو جوړول او نورو برخو کې پانګونې ته چمتوالی ښودلی.
يادو شرکتونو د تېلو را ایستلو او د اوبو د لېږد لپاره د پمپونو په نصبولو کې هم ډاډ ورکړی.
د ياد وزارت د پانګوني رييس صبغت الله اخندزاده د دغه شرکتونو له استازو سره په ليدنه کې ډاډ ورکړی چې په افغانستان کې د پانګونې لپاره ښه امکانات برابر شوي او هېواد یې له سيمې او ګاونډيو سره ښې اړيکې لري.
دغه شرکتونه داسې مهال په افغانستان کې د پانګونې خبر ورکوي چې تر دې وړاندې هم چينايي شرکتونو په مختلفو برخو کې د پانګونې چمتوالی ښودلی وو او ويلي وو چې د امو په نفتي حوزه کې به ۲۴ نوې څاه ګانې وکيندي او ورسره به د نفتو د استخراج په کچه کې ډېروالی راشي.
سرپرست حکومت وايي، پانګوالو ته په ټولو برخو کې اسانتياوې برابروي.
د يادونې ده چې سرپرست حکومت بار، بار افغانستان د پانګوني لپاره مساعد ګڼي او په پانګوالو غږ کوي ترڅو په افغانستان کې پانګونه وکړي.
