د ریاست الوزرا اقتصادي معاونیت خبر ورکړی چې ارزګان ولسوالۍ ته د کجکې بند څخه د ۲۰۱ میلیون افغانیو په ارزښت د برېښنا رسونې د یوې شبکې پرانیست غونډه ترسره شوې ده.
له دغه معاونیت څخه په خپره شوې خبرپاڼه کې راغلي چې د برېښنا رسونې دغه شبکه چې له کجکي بند څخه سرچینه اخلي او ۲۰۱ میلیون افغانۍ لګښت ورباندې راځي مصارف یې د افغانستان د برېښنا شرکت لخوا ورکول کېږي.
خبرپاڼه زیاتوي ددغه پروژې د بشپړېدو سره به نږدې څلور زره او ۵۰۰ کورنیو ته د برېښنا رسونې اسانتیا رامنځ ته شي.
د ریاست الوزرا اقتصادي معاون ملا عبدالغني برادر چې د برېښنا رسونې په دغه پرانیست غونډه یې ګډون کړی و ویلي چې افغانستان له پخوا راهیسي پر وارداتي بریښنا متکي دی او د عوایدو ډېره اندازه د برېښنا په مقابل کې ورکول کېږي.
برادر وایې د برېښنا له کورنیو سرچینو ګټه اخیستل کولای شي چې افغانستان له وارداتي برېښتا څخه پر خپله برېښنا متکي کړي.
